Þverártindsegg

Hvítasunnan er um næstu helgi. Þá ráðgerir hópur úr TKS (trimmklúbbi Seltjarnarness) að ganga á Þverártindsegg. Þessi ganga var ákveðin um miðjan vetur og mörg okkar hafa notað þetta takmark til að halda sér við æfingar. Ég verð að viðurkenna að ég hefði mátt vera duglegri. Líkamsræktin var ekki heimsótt eins oft og ég hefði viljað hafa. 

Hvað um það, ég hef náð að hlaupa nokkrum sinnum tæpa 10 km, varð að vísu aum í löppunum í aprílbyrjun og hvíldi hlaupaskóna aðeins. Fór á Skessuhorn á sumardaginn fyrsta og nú þrjár ferðir á Esjuna á einni viku. Seinast nú í kvöld og var ca 50 mín upp að steini. Það var takmarkið til að telja mig færa um að fara svo nú er ég útskrifuð og klár í slaginn.

Verst að veðurspáin fyrir helgina er ekki alveg að gera sig. Annars getur það nú breyst og okkar reynsla er sú að það þýðir ekkert að láta veðrið slá sig út af laginu. Hér að neðan er stolin mynd af netinu af Þverártindseggjum, ég veit ekkert hvar okkar gönguleið mun liggja, tek fram að þetta á ekki að vera klifur þannig að bláa línan upp þverhníptan hamarinn er klárlega ekki okkar leið.

Athugasemdir

[Lára Hanna Einarsdóttir, 6.5.2008 kl. 22:55]

Gangi ykkur vel! Hér er fjallað um nýlega göngu á Hvannadalshnjúk og Sveinstind í máli og myndum, þú gætir haft gaman af að skoða þetta.

[Bylgja (IP-tala skráð) 7.5.2008 kl. 09:32]

Viltu ættleiða mig og draga mig svo í þessar göngur. Síðan gætirðu hjálpað barnabarninu (syni mínum) að læra fyrir samræmdu prófin þegar þar að kemur

PS. Fer ekki að koma tími á stefnumót?

[Ásdís (IP-tala skráð) 7.5.2008 kl. 13:59]

Úha, skoðaði myndina fyrst og las textan á eftir... Svakalega bratt þarna vinstra megin, virkar nokkurnveginn lóðrétt. En spennandi er hún Þverártindsegg og ég segi góða ferð og vonandi rætist úr veðrinu. Ég er reyndar að vonast eftir hressilegri rigningu í landgræðsluna svo okkar hagsmunir fara ekki alveg saman þessa vikuna:)

[Kristjana Bjarnadóttir, 7.5.2008 kl. 20:32]

Bylgja mín, ég skal með glöðu geði ættleiða þig og þú ert ætíð velkomin með mér í gönguferð, næsti hittingur verður á gönguskóm. Það má vel vera að sonur þinn sleppi vel frá þessum alræmdu samræmdu prófum því það á held ég eitthvað að draga úr þeim og breyta.