Missti ég af góðærinu?

Kunningi minn sagði við mig nýlega að hann hefði heyrt fólk fagna kreppunni, þá væri ekki lengur þessi þrýstingur á að eiga allt, þetta væri bara ákveðinn léttir. 

Það var og.

Í góðærinu áttu allir að kaupa allt sem þeim datt í hug. Jeppa, flatskjá, nýjar innréttingar. Þetta var svo mikill þrýstingur á marga að þeir stóðust ekki mátið. Dótið var keypt, stundum útá krít.

Ég er alveg ofboðslega löt. Ég nenni ekki í búðir til að skoða dót. Þess vegna kaupi ég lítið, nema útivistardót, verð að viðurkenna að það er æði hár útgjaldaliður.

Framkvæmdir innanhúss vaxa mér í augum. Af illri nauðsyn stóðum við reyndar í framkvæmdum á vatnslögnum í húsinu okkar fyrir ári. Því fylgdi endurnýjun á baðherbergi með tilheyrandi búðarápi og útgjöldum.

Þar fyrir utan þá missti ég af góðærinu. Eldhúsinnréttingin sem var gömul og ljót fyrir 10 árum þegar við fluttum inn, hún er ennþá gömul og ljót. Enginn jeppi var keyptur þegar þeir áttu ekki að kosta neitt innfluttir frá Ameríku. Sjónvarpið með gömlum túpuskjá og geislaspilarinn ónýtur síðan um þarseinustu jól.

Nú er allt að hækka og ég beið góðærið af mér. Ætli ég bíði ekki bara kreppuna af mér líka?

Athugasemdir

[Solla Guðjóns, 17.4.2008 kl. 08:42]

Svo skrítið sem það er þá fór þetta góðæri fram hjá mér.Og þó ég hafði efni á að láta dóttir mína í tannréttingar......er það góðæri??

[Kristjana Bjarnadóttir, 17.4.2008 kl. 09:17]

Til að leiðrétta mögulegan misskilning:

Ég hef haft það mjög fínt í góðærinu. Gleymdi bara að versla.

[Erna Bjarnadóttir, 17.4.2008 kl. 11:13]

Gleymdir að taka neyslulán meinar þú

[Anna Einarsdóttir, 17.4.2008 kl. 19:41]

Er þá ekki bara minna drasl að þurrka af ? 

[Lára Hanna Einarsdóttir, 19.4.2008 kl. 18:47]

Það er alveg eins og þú sért að lýsa mér - nema hvað ég er ekki byrjuð á baðherberginu og ég reif niður helminginn af eldhúsinnréttingunni fyrir 3 árum. Annars stemmir allt annað! 

[Margrét St Hafsteinsdóttir, 19.4.2008 kl. 22:42]

Gvuð hvað ég skil þig Kristjana