Samningslausir iðnnemar

Kreppan hefur mörg andlit. Okkur er tíðrætt um atvinnuleysi, tekjumissi og gjaldþrot heimila og fyrirtækja.

Þessu til viðbótar er vandi iðnnema. Þeim er skylt að vera á samning hjá meistara í sínu fagi í ákveðinn tíma til að geta lokið sínu námi. Ákveðin bókleg og verkleg fög geta þessir nemar ekki tekið í skólanum fyrr en að loknum samningstíma.

Þessir nemar eru meðal þeirra sem misst hafa vinnuna nú seinustu vikur og mánuði. Atvinnumissir fyrir þessa einstaklinga er því ekki einungis tekjumissir, heldur einnig stöðvun á námsframvindu og algerlega ómögulegt er að reikna út hvenær hægt verður að halda náminu áfram.

Rof á námi getur í mörgum tilvikum þýtt að nemar gefist upp og hrökklist frá námi. 

Við megum síst af öllu við þessu þar sem hlutfall þeirra sem ekki hafa lokið neinu prófi eftir grunnskólapróf er nú þegar alltof hátt hérlendis og með því hæsta sem gerist meðal ríkja OECD.

Það að þjóðin sé vel menntuð er mýta sem við þurfum að horfast í augu við að stenst ekki skoðun.

Athugasemdir

[Mundi (IP-tala skráð) 5.2.2009 kl. 13:10]

Einkennilegt þykir mér ef menn eru að segja upp iðnnemum. Þegar ég var í iðnnámi á sínum tíma, þá voru nú launin ekkert til að hrópa húrra fyrir, maður stóð sig vel í vinnu, það fékk ég staðfest, og var þar með fínasti starfskraftur sem kostaði varla rassgat í bala að hafa á launum....

[Þórunn Ella (IP-tala skráð) 5.2.2009 kl. 18:46]

Já það er ferlegt.

En ég var að lesa þetta með rússana, þar sem að ég á Finnskan mann þá hef ég heyrt ansi mikið um rússa... og hef reynt að tjá mínar skoðanir við íslendinga útfrá því. En allir hlæja að mér og telja mig forheimska að halda virkilega að rússar séu með eitthvað grunsamlegt í pokahorninu.

Ef það verður minnsti vinasamningur milli rússa og íslendinga er ég farin til Finnlands, þeir þjálfa þúsundir manna á hverju ári í hernum, aðallega til að verjast utanaðkomandi ógn (a.k.a rússa)