Ég óttast uppúrsuðu

Krafan um aðkomu erlendra aðila við rannsókn á bankahruninu er orðin æpandi. Æ, fleiri lýsa því yfir að ekkert annað komi til greina.

Stjórnvöld verða að sýna í verki að ætlunin sé að vinna þessa rannsókn á þennan hátt. Það sýður á almenningi. Ég hef það á tilfinningunni að fjöldi á vikulegum mótmælafundi á Austurvelli nk. laugardag kl 15 verði mun meiri en áður. Fólki er orðið ljóst að það er nauðsynlegt að sýna með einhverjum hætti hug sinn í verki.

Sturla vörubílsstjóri hvatti til átaka sl. laugardag. Ég sé ekki fyrir mér að átök brjótist út þegar venjulegt fjölskyldufólk safnast fyrir á Austurvelli um miðjan dag á laugardegi. Ég hins vegar óttast að átök og jafnvel óeirðir geti brotist út í miðbænum um nætur þegar fólk hefur fengið sér í báðar tærnar. Það er ekki gott að segja fyrir um hvernig slíkt getur endað. Ég hef það frá íbúum í miðbæ Reykjavíkur að svefnfriður um sl. helgi hafi verið lítill vegna háreista fólks. Taugarnar eru greinilega þandar.

Til að almennir borgar beri traust til rannsóknar á bankahruninu verður að fá erlenda aðila STRAX. Við verðum að fá fullvissu um að hægt sé að treysta rannsóknaraðilum.

Ég óttast að einhvers staðar sé tregða gegn þessu og ég óttast að sú tregða losni of seint.

Athugasemdir

[Hákon Jóhannesson (IP-tala skráð) 4.11.2008 kl. 23:02]

Það sýður nú og kraumar hér á landi nú þegar, enda fólkið í landinu löngu komið með upp í háls; spurning hvenær sýður upp úr og flæðir ? Sú hætta er til staðar. 

Til þess að það verði ekki, verður að fylgjast með pottinum og hluti þess er að fá nú þegar - og án málalenginga - algerlega hlutlausa skoðunar- og rannsóknaraðila í verkið.

Þetta er ekki tillaga,  þetta er krafa fólksins í landinu.

Kveðja Hákon

[Lára Hanna Einarsdóttir, 4.11.2008 kl. 23:54]

Það er langt síðan það hefur verið eins órólegt og mikill hávaði í miðbænum um helgi eins og þá síðustu. Öskrin og lætin voru yfirgengileg - og allar fangageymslur fullar hjá lögreglunni.

Sjáum til hvort þetta heldur áfram eða var bara mánaðamótagusa.

Það var að minnsta kosti ekki fullt tungl.