Fólk framtíðarinnar

Þessa dagana er auðvelt að gleyma sér í svartsýnisrausi. Auðvelt að finnast allt vera á niðurleið og engin framtíðarsýn.

Við megum ekki gleyma því að mikill mannauður er í ungu fólki. Um helgina stóðst 18 ára sonur minn nýliðapróf björgunarsveitarinnar Ársæls. Þjálfunin hefur staðið í eitt ár og fólst meðal annars í: Skyndihjálparnámskeiðum, kennslu í ferða- og fjallamennsku, kennslu í rústabjörgun og svona mætti lengi telja. Fjallamennskunámskeiðin voru erfiðust, helgarferð frá föstudegi til sunnudags á jökli um miðjan vetur, fyrst rigning og síðan frost. Þar var farið yfir atriði sem tengjast ferðalögum á jöklum, ísklifur og fleira, hafst við í tjöldum og dagskrá meginhluta sólarhringsins. Björgunarsveitarfólk verður að hafa nokkurra sólarhringa úthald og þjálfunin miðast við þann veruleika.

Prófið sjálft var um 30 tíma vinna við lausn á mismunandi þrautum. Nokkurra klukkustunda rötunaræfing um erfitt landsvæði og síðan próf í leitartækni og fleiri atriðum. Engin hvíld. Hluti af prófinu fólst í því að kunna að bjarga sér og félögum sínum við erfiðar aðstæður og einnig að útbúnaður væri réttur og nægilega góður.

Á dögum eins og í dag þegar bankakreppa vofir yfir er mikilvægt að minnast þess gríðarlega mannauðs sem liggur í unga fólkinu okkar.

Ég er ákaflega stolt móðir í dag.

Athugasemdir

[Lára Hanna Einarsdóttir, 5.10.2008 kl. 16:53]

Til hamingju með soninn, Kristjana! Þetta er stór áfangi á ferlinum, það þekki ég eftir að minn strákur fór í gegnum þetta allt saman hér einu sinni. Hann byrjaði 14 ára í unglingadeildinni og var orðinn fær í flestan sjó strax 16 ára eða svo. Leiddi síðan skyndihjálparlið Kvennaskólans til sigurs í keppni á vegum Rauða krossins og liðið hans fór í alþjóðlega skyndihjálparkeppni erlendis.

Þegar hann byrjaði hét sveitin Ingólfur sem síðan sameinaðist sveitinni á Seltjarnarnesi undir nafni Ársæls (Sæla kafara, stofnanda Ingólfs).

Þetta er mikið vinna og tímafrek en þroskandi og skemmtileg. Þótt minn strákur hafi ekki verið virkur í nokkur ár sökum anna á öðrum vettvangi er þetta lærdómur sem verður aldrei frá honum tekinn og hann mun búa að um aldur og ævi.

Til hamingju, enn og aftur! 

[Bylgja (IP-tala skráð) 6.10.2008 kl. 01:11]

Til hamingju með drenginn.

Ég var með saumaklúbb í kvöld og allt kreppu og peningatal var bannað. Peningar eru fl þess sem gjöra skal sagði Benedikt Sveinsson (faðir Einars Ben) og eru það orð að sönnu. Hins vegar mega þeir aldrei verða aflið eina.

Kominn tími á að við hittumst