Gengið um Gerpissvæðið

Á hverju sumri fer ég í nokkra daga gönguferð (oftast 6 daga) með félögum mínum í Trimmklúbbi Seltjarnarness. Nú er ég nýkomin úr einni slíkri sem var um Gerpissvæðið milli Norðfjarðar og Reyðarfjarðar. Að þessu sinni var þetta trússferð en áður höfum við ferðast um eins og snigillinn með allt á bakinu.

Ferðaþjónustan á Mjóeyri við Eskifjörð sá að mestu um skipulagningu, leiðsögn og trúss. Gönguleiðin var eftirfarandi:

Dagur 1: Úr Norðfirði um Hellisfjörð í Viðfjörð
Dagur 2: Úr Viðfirði út á Barðsnes. Þeir sprækustu fóru upp í Kerlingarskarð og gengið var á Sandfell.
Dagur 3: Jarðmyndanir og steingervingar á Barðsnesi skoðað.
Dagur 4: Frá Barðsnesi í Vöðlavík. Nokkrar leiðir voru mögulegar. Ég fór um Sandvíkurskarð yfir í Sandvík, gekk í leiðinni á Gerpiskoll og síðan um Gerpisskarð yfir í Vöðlavík.
Dagur 5: Frjáls dagur í Vöðlavík. Ég gekk ásamt 8 öðrum á fjallið Snæfugl.
Dagur 6: Gengið út fyrir Krossanesskriður yfir að Karlsskála yst í Reyðarfirði.

Hér að neðan verður ferðasagan sögð með nokkrum myndum.

Í Kerlingarskarði sem er milli Viðfjarðar og Sandvíkur. Þar þurfti að gæta varúðar vegna lauss grjóts sem hrundi úr sporum okkar. Mátti litlu muna að einn steinninn færi í höfuð einnar konunnar. Í staðinn lenti hann í fæti annarrar og skrámaði hana. Sú fékk litla samúð því við vorum svo ánægð með stefnubreytinguna sem þetta slys olli á steininum!

Kerlingin í Kerlingaskarði skoðuð.

Það er hefð fyrir því að taka börn með í ferðina. Þau hafa aldrei verið til trafala á göngu og á kvöldin eru þau mjög dugleg að leika sér saman algerlega þvert á aldur.

Á Barðsnesi er mikil litadýrð.

Á Barðsnesi eru steingerð eða koluð tré sem hafa verið mjög sver og margar mannhæðir að hæð. Þau bera þess vitni að loftslag hafi verið með allt öðrum hætti hér fyrir mörgum milljónum ára.

Hér sést yfir í Vöðlavík úr Gerpisskarði, frá vinstri: Sauðatindur, Snæfugl, Svartafjall og Hesthaus. Snæfuglinn freistaði okkar sem verkefni næsta dags.......

Snæfugl freistaði okkar og gengum við 9 á hann. Leiðin var víða hrikaleg, háir hamrar og við fikruðum okkur meðfram klettunum, verst var hversu grjótið var víða laust. En upp komumst við og þá fær göngumaður ríkulega útborgað.

Þetta er nú bara svona smá montmynd af toppnum.

Þegar upp var komið hugsaði ég með mér: "Úff hvernig verður að komast niður", það gekk bara vonum framar, en klöngur var þetta.

Ganga þurfti nokkurn spöl á milli klettabelta. Milli klettabeltanna var snarbratt og við fikruðum okkur eftir riminni þar á milli.

Útsýni af Karlsstöðum í Vöðlavík. Svartafjall, Snæfugl, Hesthaus.

Leiðsögumaðurinn Sævar og hundurinn Týra. Sævar er einnig leiðsögumaður fyrir hreindýraveiðimenn á svæðinu. Sævar er flinkur leiðsögumaður, les hópinn vel, leiðbeinir fólki vel með mismunandi gönguleiðir en það er nauðsynlegt þegar um 55 manna hóp er að ræða. Einnig segir hann vel frá og hafsjór af alls kyns sögum af svæðinu.

Mest áhrif hafði hann þó á hópinn þegar hann sagði frá strandi rækuskipsins Bergvíkur í Vöðlavík á Þorláksmessu 1993 og síðan í framhaldi af því þegar björgunarskipið Goðinn fórst við tilraunir til að ná Bergvíkinni af strandstað í janúar 1994. Þá var Sævar 23 ára og var vettvangsstjóri á strandstað.

Ég hvet fólk eindregið til að skoða þetta svæði og fá Sævar til að sjá um ferðina, hann og konan hans Berglind leggja sálina í það sem þau gera og ég óska þeim alls hins besta í því.

Athugasemdir

[Lára Hanna Einarsdóttir, 20.7.2008 kl. 12:49]

Ég fell í stafi af hrifningu og aðdáun. Þetta hefur verið dásemleg ferð og a.m.k. af myndunum að dæma hafið þið fengið prýðilegt veður.

Takk fyrir að sýna og segja frá... 

[Anna Einarsdóttir, 20.7.2008 kl. 14:02]

Já, þvílíkt !  Þetta hljóta að vera yndislegar æskuminningar fyrir börnin að eiga. 

Ég verð næstum svöng af að sjá myndirnar, maður verður svo svangur alltaf í svona gönguferðum.    Ofboðslega ertu annars dugleg að ganga, Kristjana.

[Þorbjörg (IP-tala skráð) 21.7.2008 kl. 09:59]

Takk fyrir síðast, Kristjana.

Mikið var gaman að fá ykkur í heimsókn og gaman að gangan heppnaðist vel.  Það er margt fallegt að sjá á Austurlandinu.  Af myndunum að dæma hefur verið þokkaleg fjallasýn.  Mér varð oft hugsað til ykkar þessa daga.

[Kristjana Bjarnadóttir, 21.7.2008 kl. 18:33]

Takk fyrir

Lára, þetta var frábær ferð og veðrið var gott allan tímann. Auðvitað hvessti aðeins og ringdi smá, en það er ekki hægt að búast við sól og sælu alla 6 dagana. Það var alltaf gott skyggni.

Anna, við tókum krakkana með í 4 ferðir og ég held að þetta séu með dýrmætari stundum sem við höfum átt. Því miður vorum við bara tvö núna en þau vilja samt enn fara í svona ferðir, Sindri fer með félögum sínum í nýliðum björgunarsveitarinnar og Rán ætlar seinna í sumar með okkur og vinafólki okkar. Þau voru bæði að vinna núna.

Þorbjörg, takk fyrir okkur. Það var yndislegt að heimsækja ykkur og ætti maður að vera duglegri við að rækta gömul tengsl.