Hvíld

Í dag tek ég hvíldardag. Það er líka nauðsynlegt að leyfa skrokknum að slaka á.

Hugrún göngufélagi minn, stendur fyrir gönguferðum á þriðjudögum og í dag á að ganga á Lambafell við Þrengslaveg. Mig langaði með og var að hugsa um að skella mér en Evrovision hafði betur.

Ég giska á að einhverjir fastagestir þessarar síðu telji mig vera hreyfióða þessa dagana. Þeim vil ég benda á að þetta er ekki svo mikið umfram það sem ég geri venjulega. Ég hef undanfarin ár mætt nokkuð vel í hlaupatíma TKS sem eru þrisvar í viku, mánudaga, miðvikudaga og laugardaga. Því til viðbótar fór ég oft í ræktina á sunnudagsmorgnum í vetur og einnig stundum á gönguskíði. Í vor hef ég svo farið nokkrum sinnum á Esjuna.

Það skal að vísu viðurkennt að ég hef ekki oft náð 5-6 verulega aktífum dögum á viku.

Þar sem ég bý með maraþonhlaupara og margir göngufélagar okkar eru verulega sporléttir þá hef ég einsett mér að reyna að hanga í þessu fólki. Þetta er frábær félagsskapur og vellíðanin sem fylgir góðu líkamlegu ástandi eru ómetanleg laun fyrir puðið.

Athugasemdir

[Lára Hanna Einarsdóttir, 13.5.2009 kl. 00:16]

Nú munaði mjóu, maður!    Ég var næstum búin að spyrja þig hvort þú tækir að þér einkaþjálfun!

Mundi þá að ég er með ónýtt bak og get ekki gengið uppímót - og laflausa ökkla svo ég misstíg mig alltaf, jafnt gangandi sem hlaupandi.

Sjúkkit!